N’avota so’ stato ‘e legno

pe’ l’animale ero sustegno

l’acqua bevevano a sazietà

‘a purtavo a lloro pe faticà.

 

Songo ‘o sicchio ca se porta pe’mmano

currenne o jenne chiano.

No chillo da munnezza chillo nun m’appartena

si pure l’aggio fatto e che pena!

 

Isso è signore, è nu contenitore, è pattumiera

bello, perfetto… o mettesso int’a zuppiera!

‘Ncuollo sacchette grige, nire, gialle, paunazze…

Nun fatica, nun tene strapazzo.

 

Turnamme a nuie, ero ‘e legno, po’ trasfurmate…

e’ metallo, ‘e rame, ‘e rammera stagnata

E’ pur’je ogge so’ e’ plastica fatto

e aggiungo di colore e ben fatto.

 

Ma ce stato nu tiempo assai niro

ca se ce penso me manco ‘o respiro

me ienchevano ‘e mmerda, lota, pipì…

sbacantato fernevo e’ suffrì.

 

… e’nventaine ‘o’vase e’notte, Aaah!

Chillu cristiane cient’anne addà campà

nun ne puteve cchiù, ‘o schifo, ‘o fieto

chille ca parlavano areto.

 

Scusate se ancora insisto è assenziale

ma ‘a’nvenzione do rinale

è stata na cosa assaie bella

ma levate a’mieze ‘e guarattelle.

 

Per cui tanto di cappello, chapeau!

Sì, saccio pure ‘o francese, che vvuò!

Sulo chi a’sufferte comma mmè

po capì… seh, seh, te vulesse vedè.

 

Aggio fatto pure ‘o sfrattamunnezza

sfuttò popolare… che scrianzatezza!

Ma e’ fatte se sanno mannaggia Bubbà

vulisse cagnà ma che ce vuo fa?

 

Venette ‘o mumento ca uno penzaie

pe lavà ‘nterra ‘a fatica è assaie.

Mettimmo ‘nziem straccio e bastone

maie cchiù faccia ‘nterra, i’cocc’assione!

 

E ‘a tanno ‘o bastone fui chiammato

mazza e’ terra e mbonte a isso, ‘ncappato,

non più ‘o straccio ma ‘a mappina

se bagnava int’a’mme e faceva a ballarina.

 

‘Nce capevamo a sische e pernacchie

che bellezza era proprie ‘na pacchia.

Je cu’ll’acqua bagnava ‘a mappina

‘a mazza e’ terra nun faceva ruina.

 

Quanta bella fatica, surore e sciordezza

c’avimme fatto cu tanta allerezza,

certo ‘nce simme pure ‘ndussecato

quanno aimme ‘ncuntrato ‘o maleducato.

 

Parola assaie fine maleducato

più appropriato è scurnacchiato.

Gente fetente, gente schifosa

brutta razza tutt‘ngguacchiosa.

 

‘Mpietto pè stu dulore vulesse alluccà

ma po’ ce penso e dico tira a’campà

chille ca fanne male se credeno putente

è solo fetenzia… so na’massa e’fetiente.

 

Quanta schifezza c’arrunamme

sentenne “… ma comme diece fanno?”

Sporcano, ‘nzevene che purcaria

e ancora siente “Maronna mia!”

 

Si stanno ‘e lappese a quatrigliè

senza chiederti pecchè

t’arriva nu caucio e “Si nu chiuvo!”

facennete credere nu scaurachiuove.

 

Pe bbia e’sta’ggente e’niente

venimme jettati comm’e pezziente.

‘A lira fa ‘o ricco, ‘a crianza fa ‘o signore.

Sante parole ca o’core portano calore.

 

Nce guardamme je, ‘a mazza e ‘a mappina

nce vulesseme j’ sott’o bbraccio e’matina

pe’ mannarle a chillu paese

secutannele comme nu cane e’ presa

 

Ebbote… je, ‘a mappina e ‘a mazza

vulesseme sfrennesià miezo ‘a chiazza

pe’ scummiglià tutte quant‘e’zelle

e rompere tutt’e’giarretelle.

 

Passato è ‘o tiempo cagnata è ‘a storia

me resta sulamente chesta memoria

ca me porta l’ogge e dimane chissà,

certa ‘a vita mia è chesta ccà.

 

Songo ‘o sicchio è rimango tale

pe’ lavà ‘nterra faccio ‘o principale

l’acqua ca porta addà essere pulita

pecchè nce metto a faccia e ‘a vita.

 

Cuofano saglie e cuofano scenne

‘a sorte è cchesta che vaie chiagnenne?

Na sola cosa nce sta, ca è verità,

quanno ‘a morte vene tutti jamme llà.